បុគ្គលអ្នកទ្រុស្តសីល ស្អប់ធម៌ ជាប្រភេទមនុស្សអន់ មិនស្វែងយល់ដល់សេចក្តីពិត ពួកគេនឹងធ្លាក់ចូលក្នុងសេចក្តីបង្រៀនក្លែងក្លាយ ដែលនាំទៅដល់ការខាតបង់ពេលវេលា ទ្រព្យសម្បត្តិ និងអាចឈានដល់ជីវិតក៏មាន ។
មនុស្សនៅក្នុងក្រុមនេះ នឹងធ្វើខ្លួនងាយឲ្យអ្នកដទៃបោកបញ្ឆោត បំភ័យ ឬអូសទាញឲ្យធ្វើអំពើផ្សេងៗដែលគ្មានភាពប្រាកដនិយម ដូចជាត្រូវគេបោកឲ្យជឿលើការសាក់លើខ្លួនប្រាណ ការទិញកន្សែងយ័ន, ការទិញថ្នាំបុរាណធ្វើពីឫសឈើឬឆ្អឹងសត្វ, ការស្រោចទឹកលើករាសី, ការទស្សន៍ទាយមើលអនាគតជាដើម ។
មនុស្សក្រុមនេះ នឹងងាយត្រូវគេបញ្ឆោតឲ្យចំណាយពេលវេលា ទ្រព្យសម្បត្តិ ឬជីវិតទៅលើគោលលទ្ធិណាមួយដែលគ្មានហេតុផល ។ ពួកគេនឹងក្លាយទៅជាមនុស្សងាយនឹងធ្លាក់ចូលក្នុងការបញ្ជារបស់ជនបោកប្រាស់ដែលរង់ចាំឱកាសកេងប្រវ័ញ្ចយកប្រយោជន៍ទៅបម្រើបុគ្គលផ្ទាល់ខ្លួនឬបក្សពួករបស់គេ ដែលទាំងអស់នេះជាហេតុនាំឱ្យវិនាសទាន់ហន់ ។
